सर्लाहीको बागमती नगरपालिकाले नगर भित्रका सबै सामुदायिक विद्यालयका शिक्षक,शिक्षिकाहरुलाई आधारभूत डिजिटल तालिम दिन सुरु गरेको छ । नगरपालिका भित्र रहेको सबै सामुदायिक विद्यालयहरुका शिक्षक तथा शिक्षिकाहरुलाई सोमबारबाट १० दिने आधारभूत डिजिटल तालिम दिन सुरु गरिएको बागमती नगरपालिकाको शिक्षा शाखा प्रमुख मिन प्रसाद उपाध्यायले जानकारी दिए । उनका अनुसार अहिलेको शिक्षा प्रविधिमैत्री भएकाले नगर भित्रको शिक्षालाई पनि डिजिटल र प्रविधि मैत्री बनाउन सोमबारबाट दश दिने आधारभूत डिजिटल साक्षरता कक्षा संचालन सुरु गरिएको हो ।
वार्षिक परीक्षा सकेर बिदाको समयमा नयाँ शैक्षिक सत्रका लागि योजना निर्माण गर्ने, आवश्यक पेशागत तालिम लिने,नेतृत्व क्षमताको विकास गर्ने लगायतका गतिविधिका साथै प्रविधि तर्फ शिक्षालाई जोड्न १० दिने आधारभूत डिजिटल तालिम दिन सुरु गरिएको बागमती नगरपालिकाको शिक्षा शाखाका ओम बहादुर कार्कीले जानकारी दिए ।स्थानीय तहको पहिलो निर्वाचनबाट निर्वाचित भएर आएका नगर प्रमुख भरत कुमार थापाले पहिलो कार्यकालमै बागमती नगरपालिका भित्रका सामुदायिक विद्यालयहरुको शिक्षामा सुधार गर्न नगरपालिका भित्रका विद्यालयहरुलाई व्यावसायीक,बालमैत्री र प्रविधि मैत्री बनाउन जोड दिएका छन् ।
दोस्रो कार्यकाल पनि दोहोर्याएका नगर प्रमुख थापाले नगरका सामुदायिक विद्यालयहरुको शिक्षाको स्तर कसरी उकास्न सकिन्छ,भन्ने योजना बनाएर लागि परेका नगर शिक्षा शाखाले जनाएको छ ।जसका लागि नगर प्रमुख थापाले सरकारी सेवा सुविधा लिएका सरकारी कर्माचारीहरुका छोराछोरी सामुलायिक विद्यालयमा नै पढाउनु पर्नेमा जोड दिएका छन् ।